آنکھ لگتی بھی نہیں ہے کہ جگا دیتا ہے

آنکھ لگتی بھی نہیں ہے کہ جگا دیتا ہے

کوئی دروازے کی زنجیر ہلا دیتا ہے

گھر سے نکلو تو پتا جیب میں رکھ کر نکلو

حادثہ چہرے کی پہچان مٹا دیتا ہے

ہم جو بڑھتے ہیں کبھی امن کا پرچم لے کر

راستوں میں کوئی بارود بچھا دیتا ہے

تم صداقت کی گھنی چھاؤں میں پی کر دیکھو

زہر سچائی کا امرت کا مزا دیتا ہے

موت کے لب پہ فسوں کار ہنسی آتی ہے

جب کسی کو کوئی جینے کی دعا دیتا ہے

مصلحت سے نہیں خالی یہ زمانہ عالمؔ

بے غرض کوئی کسی کو یہاں کیا دیتا ہے

ankh lagti bhi nahin hai ke jaga deta hai

koi darwaze ki zanjir hila deta hai

ghar se niklo to pata jeb mein rakh kar niklo

hadisa chehre ki pahchan mita deta hai

ham jo barhte hain kabhi amn ka parcham le kar

raston mein koi barud bichha deta hai

tum sadaqat ki ghani chhaon mein pi kar dekho

zahr sachchai ka amrit ka maza deta hai

maut ke lab pe fusun kar hansi ati hai

jab kisi ko koi jine ki dua deta hai

maslahat se nahin khali ye zamana alam

be gharaz koi kisi ko yahan kya deta hai