ہمیں راس آنی ہے راہوں کی گٹھری

ہمیں راس آنی ہے راہوں کی گٹھری

رکھو پاس اپنی پناہوں کی گٹھری

بدل جائے کاش اس حسیں مرحلے پر

ہماری تمہاری گناہوں کی گٹھری

محبت کی راہیں تھیں ہموار لیکن

ہمیں ڈھو نہ پائے نباہوں کی گٹھری

تکلف کے سامان بکھرے تھے باہم

سو باندھے رہے ہم بھی بانہوں کی گٹھری

اجالے کے ہیں ان دنوں دام اونچے

چلو لوٹ لیں رو سیاہوں کی گٹھری

دھری رہ گئی منصف دل کے آگے

بیانوں کی گٹھری گواہوں کی گٹھری

نہ اگلی ہی جائے نہ نگلے بنے ہے

گلے میں پھنسی ایک آہوں کی گٹھری

یہ سوکھی ہوئی فصل غم جی اٹھے گی

اگر کھل گئی ان نگاہوں کی گٹھری

اٹھیں گی کسی روز سیلاب بن کر

یہ آبادیاں ہیں تباہوں کی گٹھری

مری سیدھی سادی سی باتوں پہ مت جا

مری ذات ہے کج کلاہوں کی گٹھری

hamen ras ani hai rahon ki gathri

rakho pas apni panahon ki gathri

badal jae kash is hasin marhale par

hamari tumhari gunahon ki gathri

mohabbat ki rahen thin hamwar lekin

hamen dho na pae nibahon ki gathri

takalluf ke saman bikhre the baham

so bandhe rahe ham bhi banhon ki gathri

ujale ke hain in dinon dam unche

chalo laut len ro siyahon ki gathri

dhari rah gai munsif-e-dil ke age

bayanon ki gathri gawahon ki gathri

na agli hi jae na nigle bane hai

gale mein phansi ek ahon ki gathri

ye sukhi hui fasl-e-gham ji uthegi

agar khul gai un nigahon ki gathri

uthengi kisi roz-e-sailab ban kar

ye abadiyan hain tabahon ki gathri

miri sidhi sadi si baton pe mat ja

miri zat hai kaj kulahon ki gathri