یہی صدا مجھے اکثر سنائی دیتی ہے

یہی صدا مجھے اکثر سنائی دیتی ہے

سکون کس کو بتوں کی خدائی دیتی ہے

وہ آدمی جو ہمیشہ مرے خلاف رہا

اسی کی مجھ پہ حکومت دکھائی دیتی ہے

محبتیں ہی سکھاتی ہیں ہر سبق لیکن

بہت سے درس ہمیں بے وفائی دیتی ہے

یہ انگلیاں ہی قلم بن کے چلنے لگتی ہیں

یہ چشم نم ہی مجھے روشنائی دیتی ہے

کسی کے عشق نے یوں دل کو کر دیا روشن

کہ روشنی سی ہر اک سو دکھائی دیتی ہے

سلوک ایک سا کرتی نہیں ہے الفت بھی

ملن کسی کو کسی کو جدائی دیتی ہے

نہیں ہے دور مری روح کے قریب ہے وہ

جھلک اسی کی تو مجھ میں دکھائی دیتی ہے

نہ ایسی دنیا سے امید اے ولاؔ رکھنا

جو نیکیوں کے صلے میں برائی دیتی ہے

yahi sada mujhe aksar sunai deti hai

sukun kis ko buton ki khudai deti hai

wo admi jo hamesha mire khilaf raha

usi ki mujh pe hukumat dikhai deti hai

mohabbaten hi sikhati hain har sabaq lekin

bahut se dars hamen be wafai deti hai

ye ungliyan hi qalam ban ke chalne lagti hain

ye chashm-e-nam hi mujhe raushnai deti hai

kisi ke ishq ne yun dil ko kar diya raushan

ke raushni si har ik so dikhai deti hai

suluk ek sa karti nahin hai ulfat bhi

milan kisi ko kisi ko judai deti hai

nahin hai dur miri ruh ke qarib hai wo

jhalak usi ki to mujh mein dikhai deti hai

na aisi duniya se ummid ai wala rakhna

jo nekiyon ke sile mein burai deti hai