اس زندگی سے کوئی شکایت نہیں مجھے

اس زندگی سے کوئی شکایت نہیں مجھے

کہتی ہوں سچ کہ جھوٹ کی عادت نہیں مجھے

ہوں سوتے جاگتے ترے بارے میں سوچتی

کیسے کہوں کہ تیری ضرورت نہیں مجھے

دل دے دیا تھا پہلی ملاقات میں تجھے

یہ بات ماننے میں ندامت نہیں مجھے

آنکھیں سوائے تیرے نہیں دیکھتی ہیں کچھ

اک پل ترے خیال سے فرصت نہیں مجھے

میں تو وفا کی دنیا میں رہتی ہوں اے ولاؔ

اک بے وفا سے کوئی بھی نسبت نہیں مجھے

is zindagi se koi shikayat nahin mujhe

kahti hun sach ke jhut ki adat nahin mujhe

hun sote jagte tire bare mein sochti

kaise kahun ke teri zarurat nahin mujhe

dil de diya tha pahli mulaqat mein tujhe

ye bat manne mein nadamat nahin mujhe

ankhen siwae tere nahin dekhti hain kuchh

ik pal tire khayal se fursat nahin mujhe

main to wafa ki duniya mein rahti hun ai wala

ik be wafa se koi bhi nisbat nahin mujhe