دشمن سے اتحاد کے چکر میں پڑ گیا

دشمن سے اتحاد کے چکر میں پڑ گیا

ہر دوست اب مفاد کے چکر میں پڑ گیا

تھوڑی جگہ ملی جو کسی کاخ حسن میں

دل ساری جائداد کے چکر میں پڑ گیا

کرتا رہا گریز جو اک عمر وصل سے

اب لمس کے سواد کے چکر میں پڑ گیا

اک حسن شاندار پہ کامل غزل کے بعد

شاعر نئے مواد کے چکر میں پڑ گیا

یکسانیت چھلکنے لگی اس کے شعر سے

جو شخص انفراد کے چکر میں پڑ گیا

پٹی تعصبات کی باندھی جو غیر نے

اپنوں سے ہی جہاد کے چکر میں پڑ گیا

اچھے سخن کا لطف نہیں لے سکا قمرؔ

نقاد جب عناد کے چکر میں پڑ گیا

dushman se ittihad ke chakkar mein par gaya

har dost ab mufad ke chakkar mein par gaya

thori jagah mili jo kisi kakh husn mein

dil sari jaidad ke chakkar mein par gaya

karta raha gurez jo ik umr wasl se

ab lams ke sawad ke chakkar mein par gaya

ik husn shandar pe kamil ghazal ke baad

shayar nae mawad ke chakkar mein par gaya

yaksaniyyat chhalakne lagi us ke sher se

jo shakhs infirad ke chakkar mein par gaya

piti taassubat ki bandhi jo ghair ne

apnon se hi jihad ke chakkar mein par gaya

achchhe sukhan ka lutf nahin le saka qamar

naqqad jab inad ke chakkar mein par gaya