عاقل ہے با شعور ہے کافی ذہین بھی

عاقل ہے با شعور ہے کافی ذہین بھی

اس پر ہے مستزاد وہ از حد حسین بھی

بوسہ کسی بھی پھول کا ہم نے نہیں لیا

رخسار منتظر رہے لب بھی جبین بھی

گھر لے لیا ہے عین ترے گھر کے سامنے

اور اک خرید لایا ہوں میں دوربین بھی

سب کام ہو رہے ہیں عجیب اس قدر عجیب

لکھنے سے پہلے سوچتے ہیں کاتبین بھی

اک شوخ و شنگ طفل چھپا ہے درون دل

سنجیدہ لگ رہا ہوں بظاہر متین بھی

آنکھوں میں جس کی رحم ہو ہاتھوں میں روٹیاں

وہ شخص مفلسوں کا دھرم بھی ہے دین بھی

انسانیت کے جسم پہ چند ایسے داغ ہیں

جن پر ہے شرمسار فلک اور زمین بھی

ہنستے ہوئے مرے گا کوئی دل گزیدہ شخص

آئے گا اس ڈرامے کے اندر وہ سین بھی

اشعار گر سفر نہ کریں دل سے دل تلک

دیتے نہیں ہیں داد قمرؔ سامعین بھی

aqil hai ba shuur hai kafi zahin bhi

us par hai mustazad wo az had hasin bhi

bosa kisi bhi phul ka ham ne nahin liya

rukhsar muntazir rahe lab bhi jabin bhi

ghar le liya hai ain tire ghar ke samne

aur ik kharid laya hun main durbin bhi

sab kam ho rahe hain ajib is qadar ajib

likhne se pahle sochte hain katibin bhi

ik shokh-o-shang tifl chhupa hai darun-e-dil

sanjida lag raha hun bazahir matin bhi

ankhon mein jis ki rahm ho hathon mein rotiyan

wo shakhs muflison ka dharm bhi hai din bhi

insaniyat ke jism pe chand aise dagh hain

jin par hai sharmsar falak aur zamin bhi

hanste hue mire ga koi dil gazida shakhs

aega is darame ke andar wo sain bhi

ashar gar safar na karen dil se dil talak

dete nahin hain dad qamar samiin bhi