وقت رخصت مری ماں نے مرا ماتھا چوما

وقت رخصت مری ماں نے مرا ماتھا چوما

منزلوں نے تبھی بڑھ کر مرا تلوا چوما

دی مؤذن کو دوا نیند کی اور پھر کل شب

ہم نے جی بھر کے تمہیں خواب میں دیکھا چوما

جس طرح قیمتی شے کو کوئی مفلس دیکھے

آنکھوں آنکھوں میں اسے ہم نے سراہا چوما

ہم نے سوچا تھا کہ سیرابی میسر ہوگی

تشنگی اور بڑھی ہے اسے جتنا چوما

ایک مصرعے میں سنو وصل کا پورا قصہ

از عشا تا بہ سحر یار کو چوما چوما

اس طریقے سے نہیں پیار جتایا مجھ سے

جس طریقے سے ہے اس نے مرا بچہ چوما

یہ بدن دشت سے گلشن ہوا آخر کیسے

آنکھ چومی ہے کسی کی کہ ہے دریا چوما

میری آنکھوں کے اجالوں کا سبب ہے اتنا

نام سنتے ہی محمد کا انگوٹھا چوما

ٹھیک ہونے نہ دیا زخم محبت آسیؔ

ہم نے تا عمر اسے دل سے لگایا چوما

waqt-e-rukhsat miri man ne mira matha chuma

manzilon ne tabhi barh kar mira talwa chuma

di muazzin ko dawa nind ki aur phir kal shab

ham ne ji bhar ke tumhen khwab mein dekha chuma

jis tarah qimti shai ko koi muflis dekhe

ankhon ankhon mein use ham ne saraha chuma

ham ne socha tha ke sairabi muyassar hogi

tishnagi aur barhi hai use jitna chuma

ek misre mein suno wasl ka pura qissa

az isha ta ba sahar yar ko chuma chuma

is tariqe se nahin pyar jataya mujh se

jis tariqe se hai us ne mira bachcha chuma

ye badan dasht se gulshan hua akhir kaise

ankh chumi hai kisi ki ke hai dariya chuma

meri ankhon ke ujalon ka sabab hai itna

nam sunte hi mohammad ka angwutha chuma

thik hone na diya zakhm-e-mohabbat asi

ham ne ta umr use dil se lagaya chuma