بہت چپ ہو شکایت چھوڑ دی کیا

بہت چپ ہو شکایت چھوڑ دی کیا

رہ و رسم محبت چھوڑ دی کیا

یہ کیا اندر ہی اندر بجھ رہے ہو

ہواؤں سے رقابت چھوڑ دی کیا

مناتے پھر رہے ہو ہر کسی کو

خفا رہنے کی عادت چھوڑ دی کیا

لیے بیٹھی ہیں آنکھیں آنسوؤں کو

ستاروں کی سیاحت چھوڑ دی کیا

غبار دشت کیوں بیٹھا ہوا ہے

مرے آہو نے وحشت چھوڑ دی کیا

یہ دنیا تو نہیں مانے گی عاصمؔ

مگر تم نے بھی حجت چھوڑ دی کیا

bahut chup ho shikayat chhor di kya

rah-o-rasm-e-mohabbat chhor di kya

ye kya andar hi andar bujh rahe ho

hawaon se raqabat chhor di kya

manate phir rahe ho har kisi ko

khafa rahne ki adat chhor di kya

liye baithi hain ankhen ansuon ko

sitaron ki siyahat chhor di kya

ghubar-e-dasht kyun baitha hua hai

mire ahu ne wahshat chhor di kya

ye duniya to nahin manegi asim

magar tum ne bhi hujjat chhor di kya