کیسی مہک کہاں کا کوئی پھول باغ میں

کیسی مہک کہاں کا کوئی پھول باغ میں

بس رنگ بے وفائی ہے مقبول باغ میں

آنکھوں پہ ہاتھ رکھ کے نکلنا پڑا مجھے

اک یاد نے اڑائی بہت دھول باغ میں

تتلی کو ڈھلتے دیکھنا جگنو کے روپ میں

میرا یہی ہے روز کا معمول باغ میں

جانے وہ حسن تھا کہ ہوس تھی نگاہ میں

ہر چہرہ لگ رہا تھا مجھے پھول باغ میں

عاصمؔ رسالہ ہائے گل و برگ و بار دیکھ

قدرت نے کھول رکھا ہے اسکول باغ میں

kaisi mahak kahan ka koi phul bagh mein

bas rang be wafai hai maqbul bagh mein

ankhon pe hath rakh ke nikalna para mujhe

ik yad ne urai bahut dhul bagh mein

titli ko dhalte dekhna jugnu ke rup mein

mera yahi hai roz ka maamul bagh mein

jane wo husn tha ke hawas thi nigah mein

har chehra lag raha tha mujhe phul bagh mein

asim risala ha-e-gul-o-barg-o-bar dekh

qudrat ne khol rakha hai iskul bagh mein