عدو کا ذکر نہیں دوستوں کا نام نہیں

عدو کا ذکر نہیں دوستوں کا نام نہیں

زباں پہ آج کوئی حرف انتقام نہیں

در و دریچہ کے داغ و چراغ اپنی جگہ

مجھے جلا کے نہ گزری تو شام شام نہیں

چلو ٹھہر نہیں سکتے گزر تو سکتے ہو

کہیں کہیں سے شکستہ ہے دل تمام نہیں

جسے پکارتے پھرتے ہیں کو بہ کو ہم لوگ

وہ ایک عہد تمنا ہے صرف نام نہیں

یہ خاکدان تعلق ہے پیش و پس میں نہ جا

حصول آتش و آب و ہوا مدام نہیں

کئی بجھے ہوئے سینوں کو آگ ہے درکار

زباں پہ نام تمہارا برائے نام نہیں

adu ka zikr nahin doston ka nam nahin

zaban pe aj koi harf-e-intiqam nahin

dar-o-daricha ke dagh-o-charagh apni jagah

mujhe jala ke na guzri to sham sham nahin

chalo thahar nahin sakte guzar to sakte ho

kahin kahin se shikasta hai dil tamam nahin

jise pukarte phirte hain ku ba ku ham log

wo ek ahd-e-tamanna hai sirf nam nahin

ye khakdan taalluq hai pesh-o-pas mein na ja

husul-e-atish-o-ab-o-hawa mudam nahin

kai bujhe hue sinon ko ag hai darkar

zaban pe nam tumhara bara-e-nam nahin