محراب خوش قیام سے آگے نکل گئی

محراب خوش قیام سے آگے نکل گئی

خوشبو دیے کی شام سے آگے نکل گئی

غافل نہ جانئے مجھے مصروف جنگ ہوں

اس چپ سے جو کلام سے آگے نکل گئی

تم ساتھ ہو تو دھوپ کا احساس تک نہیں

یہ دوپہر تو شام سے آگے نکل گئی

مرنے کا کوئی خوف نہ جینے کی آرزو

کیا زندگی دوام سے آگے نکل گئی

عاصمؔ وہ کوئی دوست نہیں تھا جو ٹھہرتا

دنیا تھی اپنے کام سے آگے نکل گئی

mehrab-e-khush qayam se age nikal gai

khushbu diye ki sham se age nikal gai

ghafil na janiye mujhe masruf jang hun

is chup se jo kalam se age nikal gai

tum sath ho to dhup ka ehsas tak nahin

ye dopahar to sham se age nikal gai

marne ka koi khauf na jine ki arzu

kya zindagi dawam se age nikal gai

asim wo koi dost nahin tha jo thaharta

duniya thi apne kam se age nikal gai