پھر وہی بے دلی پھر وہی معذرت

پھر وہی بے دلی پھر وہی معذرت

بس بہت ہو چکا زندگی معذرت

خود کلامی سے بھی روٹھ جاتی ہے تو

اب نہ بولوں گا اے خامشی معذرت

دھوپ ڈھل بھی چکی سائے اٹھ بھی چکے

اب مرے یار کس بات کی معذرت

داد بیداد میں دل نہیں لگ رہا

دوستو شکریہ شاعری معذرت

بے خودی میں خدائی کا دعویٰ کیا

اے خدا در گزر اے خودی معذرت

تجھ سے گزری ہوئی زندگی مانگ لی

رب امروز و فردا و دی معذرت

اک نظر اس نے دیکھا ہے عاصمؔ چلو

دور ہی سے سہی ہو چکی معذرت

phir wahi be dili phir wahi maazarat

bas bahut ho chuka zindagi maazarat

khud kalami se bhi ruth jati hai tu

ab na bolunga ai khamushi maazarat

dhup dhal bhi chuki sae uth bhi chuke

ab mire yar kis bat ki maazarat

dad bedad mein dil nahin lag raha

dosto shukriya shayari maazarat

be khudi mein khudai ka daawa kiya

ai khuda dar guzar ai khudi maazarat

tujh se guzri hui zindagi mang li

rab-e-imroz-o-farda-o-di maazarat

ik nazar us ne dekha hai asim chalo

dur hi se sahi ho chuki maazarat