کئی عکس ماہ تمام تھے مجھے کھا گئے

کئی عکس ماہ تمام تھے مجھے کھا گئے

وہ جو خواب سے لب بام تھے مجھے کھا گئے

کوئی راکھ تھی جو سلگ رہی تھی ادھر ادھر

وہ جو رنگ سایۂ شام تھے مجھے کھا گئے

وہ جو آنسوؤں کی زبان تھی مجھے پی گئی

وہ جو بے بسی کے کلام تھے مجھے کھا گئے

وہ جو منزلوں کی دعائیں تھیں نہیں لے گئیں

وہ جو راستے کے سلام تھے مجھے کھا گئے

وہ جو بکھرے بکھرے سے لوگ تھے مرے روگ تھے

وہ جو متصل در و بام تھے مجھے کھا گئے

کبھی یہ غلط کبھی وہ غلط کبھی سب غلط

یہ خیال پختہ جو خام تھے مجھے کھا گئے

kai aks mah-e-tamam the mujhe kha gae

wo jo khwab se lab-e-bam the mujhe kha gae

koi rakh thi jo sulag rahi thi idhar idhar

wo jo rang-e-saya-e-sham the mujhe kha gae

wo jo ansuon ki zaban thi mujhe pi gai

wo jo be basi ke kalam the mujhe kha gae

wo jo manzilon ki duaen thin nahin le gain

wo jo raste ke salam the mujhe kha gae

wo jo bikhre bikhre se log the mire rog the

wo jo muttasil dar-o-bam the mujhe kha gae

kabhi ye ghalat kabhi wo ghalat kabhi sab ghalat

ye khayal pukhta jo kham the mujhe kha gae