تو نہ تھا تیری تمنا دیکھنے کی چیز تھی

تو نہ تھا تیری تمنا دیکھنے کی چیز تھی

دل نہ مانا ورنہ دنیا دیکھنے کی چیز تھی

کیا خبر میرے جنوں کو شہر کیوں راس آ گیا

ایسے عالم میں تو صحرا دیکھنے کی چیز تھی

تم کو اے آنکھو کہاں رکھتا میں کنج خواب میں

حسن تھا اور حسن تنہا دیکھنے کی چیز تھی

لمس کی لو میں پگھلتا حجرۂ ذات و صفات

تم بھی ہوتے تو اندھیرا دیکھنے کی چیز تھی

آ گیا میرے مکاں تک اور آ کر رہ گیا

بارشوں کے بعد دریا دیکھنے کی چیز تھی

دھوپ کہتی ہی رہی میں دھوپ ہوں میں دھوپ ہوں

اپنے سائے پر بھروسا دیکھنے کی چیز تھی

شام کے سائے میں جیسے پیڑ کا سایا ملے

میرے مٹنے کا تماشا دیکھنے کی چیز تھی

tu na tha teri tamanna dekhne ki chiz thi

dil na mana warna duniya dekhne ki chiz thi

kya khabar mere junun ko shahr kyun ras a gaya

aise alam mein to sahra dekhne ki chiz thi

tum ko ai ankho kahan rakhta main kunj-e-khwab mein

husn tha aur husn tanha dekhne ki chiz thi

lams ki lau mein pighalta hujra-e-zat-o-sifat

tum bhi hote to andhera dekhne ki chiz thi

a gaya mere makan tak aur a kar rah gaya

barishon ke baad dariya dekhne ki chiz thi

dhup kahti hi rahi mein dhup hun main dhup hun

apne sae par bharosa dekhne ki chiz thi

sham ke sae mein jaise per ka saya mile

mere mitne ka tamasha dekhne ki chiz thi