جلوۂ ہوش ربا کوئی دکھایا جائے

جلوۂ ہوش ربا کوئی دکھایا جائے

عالم شوق کو دیوانہ بنایا جائے

تو نے دنیا ہی بدل دی مرے ارمانوں کی

غم دوراں تجھے سینے سے لگایا جائے

جاگتے جاگتے قسمت کو سلا بیٹھا ہوں

مری سوئی ہوئی قسمت کو جگایا جائے

آؤ اے خواب گہ ناز کی نیندو کہ تمہیں

جاگتی راتوں کا انداز دکھایا جائے

حشر کو حشر اٹھانے کی ضرورت نہ رہے

حشر سے پہلے کوئی حشر اٹھایا جائے

ساز دل ٹوٹ گیا وقت گیا نغموں کا

اب جوانی کا کوئی نوحہ سنایا جائے

آپ جلووں کو سمیٹے ہوئے کیوں بیٹھے ہیں

آبشاروں کی طرح نور لٹایا جائے

موجۂ زلف معنبر کا تقاضا ہے یہی

نکہت و نور کا طوفان اٹھایا جائے

چرخؔ وہ میکدہ بر دوش گھٹائیں آئیں

حرمت توبہ کو خاطر میں نہ لایا جائے

jalwa-e-hosh ruba koi dikhaya jae

alam-e-shauq ko diwana banaya jae

tu ne duniya hi badal di mire armanon ki

gham-e-dauran tujhe sine se lagaya jae

jagte jagte qismat ko sula baitha hun

miri soi hui qismat ko jagaya jae

ao ai khwab gah-e-naz ki nindo ke tumhen

jagti raton ka andaz dikhaya jae

hashr ko hashr uthane ki zarurat na rahe

hashr se pahle koi hashr uthaya jae

saz-e-dil tut gaya waqt gaya naghmon ka

ab jawani ka koi nauha sunaya jae

ap jalwon ko samete hue kyun baithe hain

absharon ki tarah nur lutaya jae

mauja-e-zulf-e-muambar ka taqaza hai yahi

nikhat-o-nur ka tufan uthaya jae

charkh wo maikada bar dosh ghataen aen

hurmat-e-tauba ko khatir mein na laya jae