جلوۂ حسن سے ہے صورت اوقات نئی

جلوۂ حسن سے ہے صورت اوقات نئی

دن نیا صبح نئی شام نئی رات نئی

ان بدلتے ہوئے حالات کا ماتم کیسا

ہر نئے دور میں بنتی ہیں روایات نئی

ہر ملاقات کا انداز نیا ہوتا ہے

جو بھی ہوتی ہے وہ ہوتی ہے ملاقات نئی

نیا پن حسن کو ورثے میں ملا ہو جیسے

ہر ادا اس کی نئی وضع نئی بات نئی

چاند تاروں میں نیا نور امڈ آتا ہے

چرخؔ وہ آتے ہیں آتی ہے نظر رات نئی

jalwa-e-husn se hai surat-e-auqat nai

din naya subh nai sham nai rat nai

un badalte hue halat ka matam kaisa

har nae daur mein banti hain riwayat nai

har mulaqat ka andaz naya hota hai

jo bhi hoti hai wo hoti hai mulaqat nai

naya pan husn ko wirse mein mila ho jaise

har ada us ki nai waza nai bat nai

chand taron mein naya nur umad ata hai

charkh wo ate hain ati hai nazar rat nai