ہر بات کاٹتے ہیں وہ تلوار کی طرح

ہر بات کاٹتے ہیں وہ تلوار کی طرح

احباب کا سلوک ہے اغیار کی طرح

دنیا میں جن کو زہد پہ اپنے غرور تھا

محشر میں وہ کھڑے ہیں خطا کار کی طرح

نظروں کا رنگ اور اشاروں کی بات اور

انکار کر رہے ہیں وہ اقرار کی طرح

طول مرض نے ان کو کسل مند کر دیا

تیمار دار بیٹھے ہیں بیمار کی طرح

حاصل کنار دوست ہو ایسا کہاں نصیب

ساحل سے دور دور ہیں منجدھار کی طرح

ہر زاویے سے ان کی جوانی کے واقعات

ترتیب دے رہا ہوں میں فنکار کی طرح

تیرے حضور آ کے زمانے کے شاہ بھی

منہ دیکھتے ہیں بندۂ نادار کی طرح

تخریب کاریوں سے ہمیں کچھ غرض نہیں

جینا ہے چرخؔ ہم کو تو معمار کی طرح

har bat katte hain wo talwar ki tarah

ahbab ka suluk hai aghyar ki tarah

duniya mein jin ko zohd pe apne ghurur tha

mahshar mein wo khare hain khata kar ki tarah

nazron ka rang aur isharon ki bat aur

inkar kar rahe hain wo iqrar ki tarah

tul-e-maraz ne un ko kasl mand kar diya

timar dar baithe hain bimar ki tarah

hasil kanar-e-dost ho aisa kahan nasib

sahil se dur dur hain manjdhar ki tarah

har zawiye se un ki jawani ke waqiat

tartib de raha hun main fankar ki tarah

tere huzur a ke zamane ke shah bhi

munh dekhte hain banda-e-nadar ki tarah

takhrib kariyon se hamen kuchh gharaz nahin

jina hai charkh ham ko to memar ki tarah