کب غریبوں کو اجالوں کی خبر ہوتی ہے

کب غریبوں کو اجالوں کی خبر ہوتی ہے

زندگی ان کی اندھیروں میں بسر ہوتی ہے

حسن کو چھوتی ہیں جب صبح کی زریں کرنیں

فطرتاً صبح وہ رنگین سحر ہوتی ہے

زندگی جن کی ترے عشق میں ہوتی ہے بسر

انہیں دنیا کی نہ عقبیٰ کی خبر ہوتی ہے

کبھی ناسازیٔ ماحول کو خاطر میں نہ لا

رات کے پردے میں ملبوس سحر ہوتی ہے

غم و عشرت کا مرقع ہے یہ دنیا اے چرخؔ

کبھی کانٹوں کبھی پھولوں پہ بسر ہوتی ہے

kab gharibon ko ujalon ki khabar hoti hai

zindagi un ki andheron mein basar hoti hai

husn ko chhuti hain jab subh ki zarrin kirnen

fitratan subh wo rangin sahar hoti hai

zindagi jin ki tire ishq mein hoti hai basar

unhen duniya ki na uqba ki khabar hoti hai

kabhi nasazi-e-mahaul ko khatir mein na la

rat ke parde mein malbus sahar hoti hai

gham-o-ishrat ka muraqqaa hai ye duniya ai charkh

kabhi kanton kabhi phulon pe basar hoti hai