Arooz is now on the App Store, for iPhone and iPad. Download →

All poetry

جو آنسوؤں کو نہ چمکائے وہ خوشی کیا ہے

Charkh Chinioti

جو آنسوؤں کو نہ چمکائے وہ خوشی کیا ہے

نہ آئے موت پہ غالب تو زندگی کیا ہے

ہمیں خبر ہے نہ اپنی نہ اہل دنیا کی

کوئی بتائے یہ انداز بیخودی کیا ہے

میں ساتھ دیتا ہوں یاروں کا حد‌ منزل تک

میں جانتا نہیں دستور رہروی کیا ہے

ترے خیال میں دن رات مست رہتا ہوں

یہ بندگی جو نہیں ہے تو بندگی کیا ہے

ترے کرم سے میسر ہے دولت کونین

ترا کرم ہے جبھی تک مجھے کمی کیا ہے

نئے پرانے نشیمن سبھی جلا کر اب

نگاہ برق کھڑی دور تاکتی کیا ہے

کسی کی چشم کرم آپ پر نہیں تو کیوں

یہ خود سے پوچھیے کردار میں کمی کیا ہے

نہ آئی جاگتی آنکھوں کے دائرے میں کبھی

یہ بد نصیب کا اک خواب ہے خوشی کیا ہے

جو بات کہتا ہوں کرتے ہیں اس پہ حرف زنی

یہ دوستی ہے تو انداز دشمنی کیا ہے

قدم قدم پہ کیے چرخؔ زندگی نے مذاق

سمجھ میں آ نہ سکا قصد زندگی کیا ہے