مچلیں گے ان کے آنے پہ جذبات سینکڑوں

مچلیں گے ان کے آنے پہ جذبات سینکڑوں

ہنس بولنے کی ہوں گی حکایات سینکڑوں

میت اٹھانے کوئی بھی آیا نہ بعد مرگ

سنتے تھے زندگی میں مری بات سینکڑوں

تم تھے تو زندگی کا نہ کوئی سوال تھا

اب جنم لے رہے ہیں سوالات سینکڑوں

کیوں اس نگاہ مست کی سب مانگتے ہیں خیر

آباد اور بھی ہیں خرابات سینکڑوں

چمکے جو تیرے نور سے دن رات تھے وہی

آنے کو یوں تو آئے ہیں دن رات سینکڑوں

پردہ نواز حسن کے قربان جائیے

اک اک حجاب میں ہیں حجابات سینکڑوں

وہ بات کوئی بھی نہ کہے گا جو ہم کہیں

تم جو کہو کہیں گے وہی بات سینکڑوں

کرتے ہیں عرض وصل پہ ہاں ہوں اجی نہیں

یعنی سوال اک ہے جوابات سینکڑوں

بنتے ہیں زندگی کے فسانے انہیں سے چرخؔ

وہ ہیں تو زندگی کی روایات سینکڑوں

machlenge un ke ane pe jazbat sainkron

hans bolne ki hongi hikayat sainkron

mayyat uthane koi bhi aya na baad-e-marg

sunte the zindagi mein miri bat sainkron

tum the to zindagi ka na koi sawal tha

ab janam le rahe hain sawalat sainkron

kyun us nigah-e-mast ki sab mangte hain khair

abad aur bhi hain kharabat sainkron

chamke jo tere nur se din rat the wahi

ane ko yun to ae hain din rat sainkron

parda nawaz husn ke qurban jaiye

ik ik hijab mein hain hijabat sainkron

wo bat koi bhi na kahega jo ham kahin

tum jo kaho kahenge wahi bat sainkron

karte hain arz-e-wasl pe han hun aji nahin

yaani sawal ik hai jawabat sainkron

bante hain zindagi ke fasane unhen se charkh

wo hain to zindagi ki riwayat sainkron