عقل حیران ہے رحمت کا تقاضا کیا ہے

عقل حیران ہے رحمت کا تقاضا کیا ہے

دل کو تقصیر کی ترغیب تماشا کیا ہے

انہیں جب غور سے دیکھا تو نہ دیکھا ان کو

مقصد اس پردے کا اک دیدۂ بینا کیا ہے

ہم شہادت کا جنوں سر میں لیے پھرتے ہیں

ہم مجاہد ہیں ہمیں موت کا کھٹکا کیا ہے

اڑتا پھرتا ہوں میں صحرا میں بگولے کی طرح

کچھ نہیں علم مرا ملجا و ماویٰ کیا ہے

میرا منشا ہے کہ دنیا سے کنارا کر لوں

اے غم دوست بتا تیرا ارادہ کیا ہے

بات پر پیچ ہنسی لب پہ شکن ماتھے پر

دل سمجھنے سے ہے قاصر یہ معمہ کیا ہے

جو تری زلف پہ جا کر نہ کھلے پھول وہ کیا

جو نہ الجھے ترے دامن سے وہ کانٹا کیا ہے

ایک کھلتا ہوا گلشن ہے تمہارا پیکر

تم تبسم ہی تبسم ہو تمہارا کیا ہے

میں نے اک بات جو پوچھی تو بگڑ کر بولے

بد گمانی کے سوا آپ نے سیکھا کیا ہے

وہ فقیروں کو نوازیں نہ نوازیں اے چرخؔ

ہم دعا دے کے چلے آئیں گے اپنا کیا ہے

aql hairan hai rahmat ka taqaza kya hai

dil ko taqsir ki targhib tamasha kya hai

unhen jab ghaur se dekha to na dekha un ko

maqsad is parde ka ik dida-e-bina kya hai

ham shahadat ka junun sar mein liye phirte hain

ham mujahid hain hamen maut ka khatka kya hai

urta phirta hun main sahra mein bagule ki tarah

kuchh nahin ilm mira malja-o-mawa kya hai

mera mansha hai ke duniya se kinara kar lun

ai gham-e-dost bata tera irada kya hai

bat pur pech hansi lab pe shikan mathe par

dil samajhne se hai qasir ye muamma kya hai

jo tiri zulf pe ja kar na khule phul wo kya

jo na uljhe tire daman se wo kanta kya hai

ek khulta hua gulshan hai tumhara paikar

tum tabassum hi tabassum ho tumhara kya hai

main ne ik bat jo puchhi to bigar kar bole

bad gumani ke siwa ap ne sikha kiya hai

wo faqiron ko nawazen na nawazen ai charkh

ham dua de ke chale aenge apna kya hai