بزم جاناں میں محبت کا اثر دیکھیں گے

بزم جاناں میں محبت کا اثر دیکھیں گے

کس سے ملتی ہے نظر ان کی نظر دیکھیں گے

اب نہ پلکوں پہ ٹکو ٹوٹ کے برسو اشکو

ان کا کہنا ہے کہ ہم دیدۂ تر دیکھیں گے

دھڑکنو تیز چلو ڈوبتی نبضو ابھرو

آج وہ بجھتے چراغوں کی سحر دیکھیں گے

اے مرے دل کے سلگتے ہوئے داغو بھڑکو

ہجر کی رات وہ جلتا ہوا گھر دیکھیں گے

تیرے در سے ہمیں خیرات ملے یا نہ ملے

ہم ترے در کے سوا کوئی نہ در دیکھیں گے

میکدے جھومیں گے برسے گی جوانی کی شراب

وہ چھلکتی ہوئی نظروں سے جدھر دیکھیں گے

ان کی نظروں سے ہے وابستہ زمانے کی نظر

وہ جدھر دیکھیں گے سب لوگ ادھر دیکھیں گے

آج ماضی کے فسانے وہ سنیں گے اے چرخؔ

میری برباد امیدوں کے کھنڈر دیکھیں گے

bazm-e-janan mein mohabbat ka asar dekhenge

kis se milti hai nazar un ki nazar dekhenge

ab na palkon pe tiko tut ke barso ashko

un ka kahna hai ke ham dida-e-tar dekhenge

dharkano tez chalo dubti nabzo ubhro

aj wo bujhte charaghon ki sahar dekhenge

ai mire dil ke sulagte hue dagho bharko

hijr ki rat wo jalta hua ghar dekhenge

tere dar se hamen khairat mile ya na mile

ham tire dar ke siwa koi na dar dekhenge

maikade jhumenge barsegi jawani ki sharab

wo chhalakti hui nazron se jidhar dekhenge

un ki nazron se hai wabasta zamane ki nazar

wo jidhar dekhenge sab log idhar dekhenge

aj mazi ke fasane wo sunenge ai charkh

meri barbad ummidon ke khandar dekhenge