Arooz is now on the App Store, for iPhone and iPad. Download →

All poetry

ہم جو مل بیٹھیں تو یک جان بھی ہو سکتے ہیں

Charkh Chinioti

ہم جو مل بیٹھیں تو یک جان بھی ہو سکتے ہیں

پورے اپنے سبھی ارمان بھی ہو سکتے ہیں

تجھ سے اس طرح پہ آ پہنچا ہے رشتہ اپنا

بن بلائے ترے مہمان بھی ہو سکتے ہیں

ہم ترے نام کی جپتے نہیں مالا ہی فقط

ہم ترے نام پہ قربان بھی ہو سکتے ہیں

دل میں آنے کی بھلا آپ کو دعوت میں دوں

گھر کے مالک کبھی مہمان بھی ہو سکتے ہیں

بت کافر کی پرستش پہ کوئی قید نہیں

پوجنے والے مسلمان بھی ہو سکتے ہیں

بے رخی تو نے بھی برتی جو خدایا ان سے

تجھ سے برہم ترے انسان بھی ہو سکتے ہیں

آج جو گردش دوراں کا اڑاتے ہیں مذاق

کل وہی لوگ پریشان بھی ہو سکتے ہیں

تو جو سمجھے مرے ارمانوں کی اہمیت کو

میرے ارماں ترے ارمان بھی ہو سکتے ہیں

جب خطا کرتے تھے اس وقت نہ سوچا اے چرخؔ

ہم سر حشر پشیمان بھی ہو سکتے ہیں