کبھی سحر سے کبھی تیرگی سے شکوہ ہے

کبھی سحر سے کبھی تیرگی سے شکوہ ہے

کبھی خدا سے کبھی آدمی سے شکوہ ہے

خود اپنی ذات سے جو آشنا نہیں اس کو

بس ایک اپنے سوا ہر کسی سے شکوہ ہے

مجازی عشق کسی کو سکوں نہیں دیتا

جسے بھی دیکھو اسے دل لگی سے شکوہ ہے

وفا اس عہد جفا میں ہے اک فریب نظر

بساط وقت کی جادوگری سے شکوہ ہے

کرے جو کھل کے عداوت نہیں ہے اس سے گلہ

منافقت سے بھری دوستی سے شکوہ ہے

سکون دل تو ملا ہے نشاط زیست نہیں

قلندروں کا یہی آگہی سے شکوہ ہے

کوئی عمل نہیں ایسا خدا کو پیش کروں

صباؔ مجھے مری اس بندگی سے شکوہ ہے

kabhi sahar se kabhi tirgi se shikwa hai

kabhi khuda se kabhi admi se shikwa hai

khud apni zat se jo ashna nahin us ko

bas ek apne siwa har kisi se shikwa hai

majazi ishq kisi ko sakun nahin deta

jise bhi dekho use dil lagi se shikwa hai

wafa is ahd-e-jafa mein hai ik fareb-e-nazar

bisat-e-waqt ki jadugari se shikwa hai

kare jo khul ke adawat nahin hai us se gila

munafaqat se bhari dosti se shikwa hai

sukun-e-dil to mila hai nishat-e-zist nahin

qalandaron ka yahi agahi se shikwa hai

koi amal nahin aisa khuda ko pesh karun

saba mujhe miri is bandagi se shikwa hai