فہم و ادراک سے رتبہ ترا بالا دیکھا

فہم و ادراک سے رتبہ ترا بالا دیکھا

قافیہ تنگ بہت فکر رسا کا دیکھا

جان و دل ہوش خرد سمع و بصر ہیں ششدر

کس نے پایا تجھے جانا تجھے سمجھا دیکھا

دیکھنے والے ترے ہوش میں کب ہوتے ہیں

آپ ہی تو نے مگر اپنا تماشا دیکھا

لن ترانی تو سنا صاف جواب ارنی

آپ سے جا کے بھی کچھ حضرت موسیٰ دیکھا

جلوۂ ہوش ربا خوب اٹھایا پردہ

کیا کہے دیدۂ دیدار طلب کیا دیکھا

جانے کس حال میں ہے کچھ نہیں عالم کی خبر

تیرے دیوانے کا عالم ہی نرالا دیکھا

تیرے پردوں ہی میں پنہان نہ ہو نور نظر

تو نے اب تک بھی نہ کچھ دیدۂ بینا دیکھا

ذرے ذرے کو ترے عکس سے پایا خورشید

قطرے قطرے کو ترے فیض سے دریا دیکھا

غنچے غنچے میں ہیں سربستہ رموز حکمت

دل عارف کی طرح پھول بھی کھلتا دیکھا

ٹھوکریں کھاتے ہیں کیا کیا نہ ابھرنے والے

مٹنے والوں ہی کو اس راہ میں اچھا دیکھا

fahm-o-idrak se rutba tira bala dekha

qafiya tang bahut fikr-e-rasa ka dekha

jan-o-dil hosh khirad sama-o-basar hain shashdar

kis ne paya tujhe jana tujhe samjha dekha

dekhne wale tire hosh mein kab hote hain

ap hi tu ne magar apna tamasha dekha

lan tarani to suna saf jawab-e-arini

ap se ja ke bhi kuchh hazrat-e-musa dekha

jalwa-e-hosh ruba khub uthaya parda

kya kahe dida-e-didar talab kya dekha

jane kis hal mein hai kuchh nahin alam ki khabar

tere diwane ka alam hi nirala dekha

tere pardon hi mein panahan na ho nur-e-nazar

tu ne ab tak bhi na kuchh dida-e-bina dekha

zarre zarre ko tire aks se paya khurshid

qatre qatre ko tire faiz se dariya dekha

ghunche ghunche mein hain sarbasta rumuz-e-hikmat

dil-e-arif ki tarah phul bhi khulta dekha

thokaren khate hain kya kya na ubharne wale

mitne walon hi ko is rah mein achchha dekha