نہ عشرت کی تمنا ہے نہ محفل کی تمنا ہے

نہ عشرت کی تمنا ہے نہ محفل کی تمنا ہے

فقط اک خلوت غم آشنا دل کی تمنا ہے

تری دریوزگی میں لطف آتا ہے اسے ورنہ

تجھے معلوم ہے جو تیرے سائل کی تمنا ہے

کچھ ایسی عافیت میں تیرے دیوانے نظر آئے

کہ اب دیوانگی ہر ایک عاقل کی تمنا ہے

یہ مد و جزر سب جذب محبت کے کرشمے ہیں

ہم آغوشیٔ باہم بحر‌ و ساحل کی تمنا ہے

مری تربت بنے یوں ہی زمین کوئے جاناں میں

الٰہی جس طرح دل میں مرے دل کی تمنا ہے

نہ نکلے کوئی ارماں بس یہی ارماں ہے لے دے کر

مرے دل کی تمنا ہی مرے دل کی تمنا ہے

محال و ممکن و دشوار و آساں جمع ہیں اس میں

نئی دنیا نیا عالم مرے دل کی تمنا ہے

دل پر آرزو نے زندگی بھر خاک چھنوائی

بس اب اے یاسؔ اک بے آرزو دل کی تمنا ہے

na ishrat ki tamanna hai na mahfil ki tamanna hai

faqat ik khalwat-e-gham ashna dil ki tamanna hai

tiri daryuzagi mein lutf ata hai use warna

tujhe maalum hai jo tere sail ki tamanna hai

kuchh aisi afiyat mein tere diwane nazar ae

ke ab diwangi har ek aqil ki tamanna hai

ye mad-o-jazr sab jazb-e-mohabbat ke karishme hain

ham aghoshi-e-baham bahr-o-sahil ki tamanna hai

miri turbat bane yun hi zamin-e-ku-e-janan mein

ilahi jis tarah dil mein mire dil ki tamanna hai

na nikle koi arman bas yahi arman hai le de kar

mire dil ki tamanna hi mire dil ki tamanna hai

muhal-o-mumkin-o-dushwar-o-asan jama hain is mein

nai duniya naya alam mire dil ki tamanna hai

dil par arzu ne zindagi bhar khak chhanwai

bas ab ai yas ik be arzu dil ki tamanna hai