موت آتی ہے نہ کمبخت قرار آتا ہے

موت آتی ہے نہ کمبخت قرار آتا ہے

تجھ پہ اب رحم بہت اے دل زار آتا ہے

کچھ نئے ہوتے ہیں آغاز محبت کے مزے

کچھ عجب شان سے دل میں غم یار آتا ہے

لطف سے چھیڑتے ہو بزم عدو میں مجھ کو

انہیں باتوں سے تو بس دل میں غبار آتا ہے

تازگی لطف محبت میں ہوئی پھر کچھ کچھ

آج پھر لب پہ مرے شکوۂ یار آتا ہے

پہلے تھی دل میں حرارت بھی بہت کچھ اب تو

نام سے عشق و محبت کے بخار آتا ہے

کروٹیں لینے سے کچھ حال بدلتا ہے کہیں

لوٹنے سے کوئی فرقت میں قرار آتا ہے

غیر تو غیر ہے تم بھی نہیں واقف ان سے

جن اداؤں پہ تمہاری مجھے پیار آتا ہے