گردش وقت کا منظر نہیں دیکھا جاتا

گردش وقت کا منظر نہیں دیکھا جاتا

یار کے ہاتھ میں خنجر نہیں دیکھا جاتا

کوئی رخصت کرے اور آنکھ میں آنسو بھی نہ ہوں

ایسے لمحات میں مڑ کر نہیں دیکھا جاتا

یہ روایت مرے پرکھوں سے چلی آئی ہے

عشق میں یار کو چھو کر نہیں دیکھا جاتا

اے خدا شہر کے حاکم کو ہدایت دے دے

چار سو عرصۂ محشر نہیں دیکھا جاتا

ہم کہ دم توڑتی قدروں کے امیں ہیں ہم سے

بنت حوا کا کھلا سر نہیں دیکھا جاتا

ہائے اس حسن بلا خیز کی تاثیر عمیرؔ

دیر تک اس کو برابر نہیں دیکھا جاتا

gardish-e-waqt ka manzar nahin dekha jata

yar ke hath mein khanjar nahin dekha jata

koi rukhsat kare aur ankh mein ansu bhi na hun

aise lamhat mein mur kar nahin dekha jata

ye riwayat mire purkhon se chali ai hai

ishq mein yar ko chhu kar nahin dekha jata

ai khuda shahr ke hakim ko hidayat de de

char su arsa-e-mahshar nahin dekha jata

ham ke dam torti qadron ke amin hain ham se

bint-e-hawwa ka khula sar nahin dekha jata

hae us husn bala khez ki tasir amer

der tak us ko barabar nahin dekha jata