کون سی مخلوق ہے یہ خاک پر

کون سی مخلوق ہے یہ خاک پر

چاہتی ہے تھوکنا افلاک پر

کھال کھینچیں آپ اس گستاخ کی

پھول کاڑھے آپ کی پوشاک پر

اپنے ہی سایوں پہ منڈلاتے عقاب

گدھ بنے اتریں گے ارض پاک پر

فکر ہے گھر کی نہ ان کو سر کا ہوش

بس کہیں مکھی نہ بیٹھے ناک پر

بڑھتا ہی جاتا ہے اک ملبے کا ڈھیر

چاک توڑے جا رہے ہیں چاک پر

گھر کے مالک تو کھنڈر کے بیچوں بیچ

لڑ رہے ہیں اب خس و خاشاک پر

لوگ ہیں یا تربتوں کے سوکھے پھول

ہنس رہے ہیں دیدۂ نمناک پر

kaun si makhluq hai ye khak par

chahti hai thukanna aflak par

khal khinchen ap is gustakh ki

phul karhe ap ki poshak par

apne hi sayon pe mandlate uqab

gidh bane utrenge arz-e-pak par

fikr hai ghar ki na un ko sar ka hosh

bas kahin makkhi na baithe nak par

barhta hi jata hai ik malbe ka dher

chak tore ja rahe hain chak par

ghar ke malik to khandar ke bichon bich

lar rahe hain ab khas-o-khashak par

log hain ya turbaton ke sukhe phul

hans rahe hain dida-e-namnak par