جسے کل رات بھر پوجا گیا تھا

جسے کل رات بھر پوجا گیا تھا

وہ بت کیوں صبح کو ٹوٹا ہوا تھا

اگر سچ کی حقیقت اب کھلی ہے

تو جو اب تک نظر آیا تھا کیا تھا

اگر یہ تلخیوں کی ابتدا ہے

تو اب تک کون سا امرت پیا تھا

کھلا ہے مجھ پہ اب دنیا کا مطلب

مگر یہ راز پہلے بھی کھلا تھا

میں جس میں ہوں یہ دنیا مختلف ہے

جہاں میں تھا وہ عالم دوسرا تھا

میں خود کو مار کر پہنچا یہاں تک

تو یاد آیا کہ میں تو مر چکا تھا

مری میں اور تری میں دونوں ہاریں

میں بندہ ہوں مگر تو تو خدا تھا

میں اب جو منہ چھپائے پھر رہا ہوں

تو کیا میں واقعی چہرہ نما تھا

jise kal rat bhar puja gaya tha

wo but kyun subh ko tuta hua tha

agar sach ki haqiqat ab khuli hai

tu jo ab tak nazar aya tha kya tha

agar ye talkhiyon ki ibtida hai

to ab tak kaun sa amrit piya tha

khula hai mujh pe ab duniya ka matlab

magar ye raz pahle bhi khula tha

main jis mein hun ye duniya mukhtalif hai

jahan mein tha wo alam dusra tha

main khud ko mar kar pahuncha yahan tak

tu yad aya ke main to mar chuka tha

miri mein aur tiri mein donon haren

main banda hun magar tu to khuda tha

main ab jo munh chhupae phir raha hun

to kya main waqai chehra numa tha