بھری ہے آگ جیبوں میں کف افسوس ملتے ہیں

بھری ہے آگ جیبوں میں کف افسوس ملتے ہیں

ہماری ہی کمائی سے ہمارے ہاتھ جلتے ہیں

مرے اطراف میں یہ کھینچا تانی کم نہیں ہوتی

ادھر پہلو بدلتا ہوں ادھر جالے بدلتے ہیں

کسی کو بھی وہ انگارہ دکھائی ہی نہیں دیتا

اشارے سے بتاتا ہوں تو اپنے ہاتھ جلتے ہیں

میں اپنے جسم سے باہر ہوں یا روحوں کا مسکن ہے

انہیں میں چھو نہیں پاتا جو میرے ساتھ چلتے ہیں

ہمارے چاک پر عقبیٰ کئی شکلیں بدلتی ہے

یہ جنت اور جہنم تو ہمارے ساتھ چلتے ہیں

نظر انداز کرکے سب گزر جاتے ہیں مجھ میں سے

نفی کرتے ہوئے مجھ میں کئی رستے نکلتے ہیں

صدا بن کر بہت ٹکرائے ہیں مینار و گنبد سے

اب آنکھیں کھل گئی ہیں تو اندھیرے سے نکلتے ہیں

bhari hai ag jebon mein kaf-e-afsos milte hain

hamari hi kamai se hamare hath jalte hain

mire atraf mein ye khincha tani kam nahin hoti

idhar pahlu badalta hun idhar jale badalte hain

kisi ko bhi wo angara dikhai hi nahin deta

ishare se batata hun to apne hath jalte hain

main apne jism se bahar hun ya ruhon ka maskan hai

unhen mein chhu nahin pata jo mere sath chalte hain

hamare chak par uqba kai shaklen badalti hai

ye jannat aur jahannam to hamare sath chalte hain

nazar andaz karke sab guzar jate hain mujh mein se

nafi karte hue mujh mein kai raste nikalte hain

sada ban kar bahut takrae hain minar-o-gumbad se

ab ankhen khul gai hain to andhere se nikalte hain