گو تار عنکبوت آیا نہیں اب تک گمانوں میں

گو تار عنکبوت آیا نہیں اب تک گمانوں میں

مگر کچھ مکڑیوں کی سرسراہٹ سی ہے کانوں میں

زمیں زادوں کو اب مٹی سے تو وابستہ رہنے دو

خدارا فصل نو کا ذوق رہنے دو کسانوں میں

سروں سے آسماں بھی کیا ہٹایا جانے والا ہے

شبیہیں مہر و مہ کی ٹانکتے ہو کیوں مکانوں میں

ذرا ٹھہرو اگے گی بھوک بھی کاغذ کے پیڑوں پر

ابھی تو ہاتھ بانٹے جا رہے ہیں باغبانوں میں

بہت ممکن ہے پتھر کے زمانے کے نظر آؤ

اگر پیدا کیا جائے تمہیں پچھلے زمانوں میں

نہ پنجے ہیں نہ پر ہیں اور نہ ہے پرواز کی طاقت

جو نغمہ سنج ہونا ہو تو لکنت ہے زبانوں میں

چلا آتا ہے بستی میں لیے زنبیل فتووں کی

تو ایسا کر بسیرا کر پہاڑوں کی چٹانوں میں

go tar-e-ankabut aya nahin ab tak gumanon mein

magar kuchh makriyon ki sarsarahat si hai kanon mein

zamin zadon ko ab mitti se to wabasta rahne do

khudara fasl-e-nau ka zauq rahne do kisanon mein

saron se asman bhi kya hataya jane wala hai

shabihen mehr-o-mah ki tankte ho kyun makanon mein

zara thahro ugegi bhuk bhi kaghaz ke peron par

abhi to hath bante ja rahe hain baghbanon mein

bahut mumkin hai patthar ke zamane ke nazar ao

agar paida kiya jae tumhen pichhle zamanon mein

na panje hain na par hain aur na hai parwaz ki taqat

jo naghma sanj hona ho to luknat hai zabanon mein

chala ata hai basti mein liye zambil fatwon ki

tu aisa kar basera kar paharon ki chatanon mein