پلکیں نیند سے بوجھل ہیں یا اب منظر کی تاب نہیں

پلکیں نیند سے بوجھل ہیں یا اب منظر کی تاب نہیں

کیوں ان جلتی آنکھوں میں اب رنگ برنگے خواب نہیں

اک مدت سے کس ناطق کی نوک زباں پر اٹکا ہوں

میں اک لفظ ہوں گویا وہ بھی معنی سے سیراب نہیں

آنکھیں ہیں یا خار مغیلاں چہرہ ہے یا صحرا ہے

لفظ بہت نایاب ہیں پیارے درد مگر نایاب نہیں

میری بلا سے جھکنے والوں میں معبود بھی شامل ہوں

لیکن میرے سجدوں میں بت خانے کے آداب نہیں

فطرت کا پیغمبر کیا جانے سمجھوتے کی باتیں

دریا مڑ سکتے ہیں لیکن دریا کے سیلاب نہیں

آنکھیں اور چنیں گی کب تک آخر منظر کی کرچیں

مجھ میں تو اب جیسے اپنی نظروں کی بھی تاب نہیں

palken nind se bojhal hain ya ab manzar ki tab nahin

kyun un jalti ankhon mein ab rang barange khwab nahin

ik muddat se kis natiq ki nok-e-zaban par atka hun

main ik lafz hun goya wo bhi maani se sairab nahin

ankhen hain ya khar-e-mughilan chehra hai ya sahra hai

lafz bahut nayab hain pyare dard magar nayab nahin

meri bala se jhukne walon mein maabud bhi shamil hun

lekin mere sajdon mein but khane ke adab nahin

fitrat ka paighambar kya jane samjhote ki baten

dariya mur sakte hain lekin dariya ke sailab nahin

ankhen aur chunengi kab tak akhir manzar ki kirchen

mujh mein to ab jaise apni nazron ki bhi tab nahin