سینے کے داغ ان کو دکھائے نہ جا سکے

سینے کے داغ ان کو دکھائے نہ جا سکے

مجھ سے فسانے غم کے سنائے نہ جا سکے

ایسے نگر میں میرا مقدر ہوا مقیم

جس میں خوشی کے دیپ جلائے نہ جا سکے

ایوان صبر آج زمیں بوس ہو گیا

پلکوں میں اشک مجھ سے چھپائے نہ جا سکے

ہم نے تو خون دل سے کھلائے ہیں گلستاں

تم سے تو خار و خس بھی اگائے نہ جا سکے

گلشن جو تھا خلوص کا یکسر جھلس گیا

جب نفرتوں کے شعلے بجھائے نہ جا سکے

بار گراں اٹھاتا رہا ہوں مگر ولیؔ

احساں کسی کے مجھ سے اٹھائے نہ جا سکے

sine ke dagh un ko dikhae na ja sake

mujh se fasane gham ke sunae na ja sake

aise nagar mein mera muqaddar hua muqim

jis mein khushi ke dip jalae na ja sake

aiwan-e-sabr aj zamin bos ho gaya

palkon mein ashk mujh se chhupae na ja sake

ham ne to khun-e-dil se khilae hain gulsitan

tum se to khar-o-khas bhi ugae na ja sake

gulshan jo tha khulus ka yaksar jhulas gaya

jab nafraton ke shole bujhae na ja sake

bar-e-giran uthata raha hun magar wali

ehsan kisi ke mujh se uthae na ja sake