Arooz is now on the App Store, for iPhone and iPad. Download →

All poetry

ہوائے شوخ کی آخر فسوں کاری یہ کیسی ہے

Vali Madni

ہوائے شوخ کی آخر فسوں کاری یہ کیسی ہے

اذیت دے کے ٹل جاتی ہے دل داری یہ کیسی ہے

برستے ہیں مسلسل اپنے سر آفات کے پتھر

بتا اے دل بلاؤں کی خریداری یہ کیسی ہے

اگی ہیں دھوپ کی فصلیں کہیں سایہ نہیں ملتا

شجرکاری کا دعویٰ تھا شجرکاری یہ کیسی ہے

کھڑی ہے اپنے دامن کو پسارے غیر کے آگے

مرے مولا پریشاں آج خود داری یہ کیسی ہے

کہیں خوشیوں کی کلیاں ہیں کہیں اشکوں کے بوٹے ہیں

حیات و موت کے مابین گل کاری یہ کیسی ہے

دریچوں سے شعاعیں جھانکتی ہیں مسکراتی ہیں

خبر تو لو پس دیوار بیداری یہ کیسی ہے

لرزتی ہے فقط اک لفظ کی ہلکی سی ٹھوکر سے

ولیؔ دل کے مکاں کی چار دیواری یہ کیسی ہے