فصیل ریگ پر اتنا بھروسہ کر لیا تم نے

فصیل ریگ پر اتنا بھروسہ کر لیا تم نے

چھتیں بھی ڈال دیں اور وا دریچہ کر لیا تم نے

تعجب ہے عبادت میں بھی ایسا کر لیا تم نے

نہیں دل کو جھکایا اور سجدہ کر لیا تم نے

کبھی مانا شریعت کی کبھی اس سے رہے عاجز

مگر دعویٰ کہ دل اللہ والا کر لیا تم نے

محبت پیار ہمدردی سبھی کو رکھ دیا گروی

حصول عیش کی خاطر جو چاہا کر لیا تم نے

سمیٹا زندگی بھر کالی گوری جیب کی رونق

ڈھلا جب عمر کا سورج تو توبہ کر لیا تم نے

طہارت کی تمنا ہے نہ دل میں حق پسندی ہے

مگر معصوم چہرہ اور لبادہ کر لیا تم نے

گراں مایہ امانت تھی اسے محفوظ رکھنا تھا

ولیؔ پاکیزہ تہذیبوں کا سودا کر لیا تم نے

fasil-e-reg par itna bharosa kar liya tum ne

chhaten bhi dal den aur wa daricha kar liya tum ne

taajjub hai ibadat mein bhi aisa kar liya tum ne

nahin dil ko jhukaya aur sajda kar liya tum ne

kabhi mana shariat ki kabhi us se rahe ajiz

magar daawa ke dil allah wala kar liya tum ne

mohabbat pyar hamdardi sabhi ko rakh diya girwi

husul-e-aish ki khatir jo chaha kar liya tum ne

sameta zindagi bhar kali gori jeb ki raunaq

dhala jab umr ka suraj to tauba kar liya tum ne

taharat ki tamanna hai na dil mein haq pasandi hai

magar maasum chehra aur labada kar liya tum ne

giran maya amanat thi use mahfuz rakhna tha

wali pakiza tahzibon ka sauda kar liya tum ne