بنا کر خود کو جس نے اک بھلا انسان رکھا ہے

بنا کر خود کو جس نے اک بھلا انسان رکھا ہے

سکون قلب کا اپنے لئے سامان رکھا ہے

سکوں کے ساتھ جینا تو بہت دشوار ہے لیکن

زمانہ نے پہنچنا مرگ تک آسان رکھا ہے

نہ کیوں محتاط رکھوں خود کو وقت گفتگو تم سے

تمہارے دل کو میں نے آبگینہ جان رکھا ہے

پری کیوں نیند کی اترے مری پلکوں کے آنگن میں

کہ میں نے پال کر دل میں عجب بحران رکھا ہے

در و دیوار پر ہیں گھونسلے کتنے پرندوں کے

کہوں کیسے کہ قدرت نے یہ گھر ویران رکھا ہے

عطا کر سامنا کرنے کی جرأت اے خدا دل میں

مری کشتی کی قسمت میں اگر طوفان رکھا ہے

مرے اوپر ولیؔ سب سے بڑا احسان ہے اس کا

کہ جس نے شاخ دل پر پھول سا ایمان رکھا ہے

bana kar khud ko jis ne ik bhala insan rakha hai

sukun-e-qalb ka apne liye saman rakha hai

sukun ke sath jina to bahut dushwar hai lekin

zamana ne pahunchna marg tak asan rakha hai

na kyun mohtat rakhun khud ko waqt-e-guftugu tum se

tumhare dil ko main ne abgina jan rakha hai

pari kyun nind ki utre miri palkon ke angan mein

ke main ne pal kar dil mein ajab bohran rakha hai

dar-o-diwar par hain ghonsle kitne parindon ke

kahun kaise ke qudrat ne ye ghar wiran rakha hai

ata kar samna karne ki jurat ai khuda dil mein

miri kashti ki qismat mein agar tufan rakha hai

mire upar wali sab se bara ehsan hai us ka

ke jis ne shakh-e-dil par phul sa iman rakha hai