محبت حاصل کون و مکاں بھی

محبت حاصل کون و مکاں بھی

محبت ایک سعیٔ رائیگاں بھی

عجب شے ہے زبان بے زباں بھی

خموشی بھی مکمل داستاں بھی

سنا ہے درد ہے تسکین جاں بھی

لبوں پر رک گئی آکر فغاں بھی

فروغ شعلۂ رنگ چمن پر

تڑپ کر رہ گئی برق تپاں بھی

فریب شوق ہے یا خود فریبی

چمن کے ساتھ فکر آشیاں بھی

مری تیرہ شبی پر ہنسنے والو

سحر تک ہے فروغ کہکشاں بھی

مجھے دیکھا تو آئینہ بھی دیکھو

کہ میرے ساتھ اپنا امتحاں بھی

نفاق دشمناں کا تذکرہ کیا

نظر میں ہے خلوص دوستاں بھی

کہاں جائے تمہارے در سے زیدیؔ

کہ دشمن ہے زمیں بھی آسماں بھی

mohabbat hasil kaun-o-makan bhi

mohabbat ek sai-e-raigan bhi

ajab shai hai zaban-e-be zaban bhi

khamoshi bhi mukammal dastan bhi

suna hai dard hai taskin-e-jan bhi

labon par ruk gai akar fughan bhi

farogh-e-shola-e-rang-e-chaman par

tarap kar rah gai barq-e-tapan bhi

fareb-e-shauq hai ya khud farebi

chaman ke sath fikr-e-ashiyan bhi

miri tira shabi par hansne walo

sahar tak hai farogh-e-kahkashan bhi

mujhe dekha to aina bhi dekho

ke mere sath apna imtihan bhi

nifaq-e-dushmanan ka tazkira kya

nazar mein hai khulus-e-dostan bhi

kahan jae tumhare dar se zidi

ke dushman hai zamin bhi asman bhi