نگاہ عاصی کی روز محشر امین رحمت کو تک رہی ہے

عجیب عالم ہے بیکسی کا نظر سے حسرت ٹپک رہی ہے

مری نظر فکر معصیت سے رہین غم آج تک رہی ہے

تمہی سے وابستہ ہیں امیدیں تمہاری صورت کو تک رہی ہے

مجھے ہو کیا خوف روز محشر کہ زیر دامان مصطفیٰ ہوں

خدا کی رحمت سے میری دنیا مہک رہی ہے لہک رہی ہے

فرشتے کیسے ازل میں ہر شے تمہاری عظمت کو جھک گئی تھی

نگاہ ابلیس میں ابھی تک وہی تو عظمت کھٹک رہی ہے

خلیل کی جرأتوں کو سمجھو شرار نمرود کو نہ دیکھو

جنوں نے منزل کو پا لیا ہے خرد ابھی تک بھٹک رہی ہے

تمہارے لطف و کرم کا صدقہ ہے دونوں عالم میں کار فرما

چمن چمن کھل رہی ہیں کلیاں فضائے عالم مہک رہی ہے

نوید اے تشنگان بادہ ہے جوش پر اب کرم کا دریا

کہ چشم ساقی سے روح کوثر ابل رہی ہے جھلک رہی ہے

وہ دھر کے آیا ہے ابر رحمت گناہ گاروں کے سر پہ زیدیؔ

دریچے جنت کے کھل گئے ہیں سر اپنا ظلمت پٹک رہی ہے