تجلیاں ہیں کہ ان کا کوئی حساب نہیں

تجلیاں ہیں کہ ان کا کوئی حساب نہیں

نگاہ شوق ہے اور دیکھنے کی تاب نہیں

جنون عشق میں اہل طلب سے ہوتا ہے

وہ اک گناہ جو مستوجب عذاب نہیں

جہاں پہ ذہن ہی مفلوج ہو کے رہ جائے

اسے کچھ اور ہی کہئے وہ انقلاب نہیں

سمجھنا چاہیں جسے اور سمجھ میں آ نہ سکے

تو پھر وہ زندگی کیا ہے اگر سراب نہیں

کرم کی پھر بھی توقع تو ہے مجھے اس سے

یہ اور بات دعا مری مستجاب نہیں

اسے تو بزم ہی کہنا گناہ ہے زیدیؔ

وہ بزم جس میں کہ ساقی نہیں شراب نہیں

tajalliyan hain ke un ka koi hisab nahin

nigah-e-shauq hai aur dekhne ki tab nahin

junun-e-ishq mein ahl-e-talab se hota hai

wo ik gunah jo mastojab azab nahin

jahan pe zehn hi mafluj ho ke rah jae

use kuchh aur hi kahiye wo inqilab nahin

samajhna chahen jise aur samajh mein a na sake

to phir wo zindagi kya hai agar sarab nahin

karam ki phir bhi tawaqqo to hai mujhe us se

ye aur bat dua miri mustajab nahin

use to bazm hi kahna gunah hai zidi

wo bazm jis mein ke saqi nahin sharab nahin