خلش دل کی رفیق شام تنہائی بھی ہوتی ہے

خلش دل کی رفیق شام تنہائی بھی ہوتی ہے

مگر جب حد سے بڑھ جاتی ہے رسوائی بھی ہوتی ہے

فراہم جن سے سامان جراحت ہوتے رہتے ہیں

انہی نظروں میں در پردہ مسیحائی بھی ہوتی ہے

نظر محسوس کر سکتی نہیں جس کی لطافت کو

کسی کی مست آنکھوں میں وہ رعنائی بھی ہوتی ہے

یہی دنیا جو ہنستی ہے مرے حال پریشاں پر

یہی دنیا کبھی میری تمنائی بھی ہوتی ہے

ادائے پرسش احوال پر کہنا مرا آخر

جفا دل پر بہ انداز شکیبائی بھی ہوتی ہے

فقط نادانیوں پر آئے کیوں الزام بربادی

کہیں وجہ تباہی صرف دانائی بھی ہوتی ہے

محبت کا وہ عالم بھی قیامت خیز ہے زیدیؔ

گوارا جس کی خاطر دل کو رسوائی بھی ہوتی ہے

khalish dil ki rafiq-e-sham-e-tanhai bhi hoti hai

magar jab had se barh jati hai ruswai bhi hoti hai

faraham jin se saman-e-jarahat hote rahte hain

unhi nazron mein dar parda masihai bhi hoti hai

nazar mahsus kar sakti nahin jis ki latafat ko

kisi ki mast ankhon mein wo raanai bhi hoti hai

yahi duniya jo hansti hai mire hal-e-pareshan par

yahi duniya kabhi meri tamannai bhi hoti hai

ada-e-pursish-e-ahwal par kahna mira akhir

jafa dil par ba andaz-e-shakebai bhi hoti hai

faqat nadaniyon par ae kyun ilzam-e-barbadi

kahin wajh-e-tabahi sirf-e-danai bhi hoti hai

mohabbat ka wo alam bhi qayamat khez hai zidi

gawara jis ki khatir dil ko ruswai bhi hoti hai