وہ اک نظر جو دل سے جگر تک اتر گئی

وہ اک نظر جو دل سے جگر تک اتر گئی

افسانۂ حیات کی تکمیل کر گئی

کیا پوچھتے ہو مجھ سے جوانی کدھر گئی

بس اتنا یاد ہے ادھر آئی ادھر گئی

ان کی نگاہ لطف یہ احسان کر گئی

دامان دل امید کے پھولوں سے بھر گئی

کیا جانے کوئی کیسی قیامت اٹھائے گی

دل سے نکل کے آہ فلک تک اگر گئی

اپنی جگہ قرینے سے ہر شے ہے بزم میں

وہ کیا گئے کہ رونق دیوار و در گئی

دو دن میں ان کے پھول سے چہرے کو کیا ہوا

دو دن میں ان کی چاند سی صورت اتر گئی

زیدیؔ بہ فیض مرگ یہ ثابت ہوا کہ زیست

موتی کی اک لڑی تھی کہ ٹوٹی بکھر گئی

wo ik nazar jo dil se jigar tak utar gai

afsana-e-hayat ki takmil kar gai

kya puchhte ho mujh se jawani kidhar gai

bas itna yad hai idhar ai idhar gai

un ki nigah-e-lutf ye ehsan kar gai

daman-e-dil umid ke phulon se bhar gai

kya jane koi kaisi qayamat uthaegi

dil se nikal ke ah falak tak agar gai

apni jagah qarine se har shai hai bazm mein

wo kya gae ke raunaq-e-diwar-o-dar gai

do din mein un ke phul se chehre ko kya hua

do din mein un ki chand si surat utar gai

zidi ba faiz-e-marg ye sabit hua ke zist

moti ki ik lari thi ke tuti bikhar gai