ورق وہی تھا مگر دوسری پرت چاہی

ورق وہی تھا مگر دوسری پرت چاہی

کہ میں نے اس کی محبت سے منفعت چاہی

مزا عجب تھا محبت بھری لڑائی میں

کہ چھیڑ کر اسے فوری مزاحمت چاہی

بچھڑتے وقت اسے مڑ کے بھی نہیں دیکھا

تمام عمر جدائی میں عافیت چاہی

میں اور ہی تھا جدا ہی تھا اس زمانے سے

اور اس نے قیس کے جیسی مطابقت چاہی

خود اپنی زیست کو برباد کر لیا آخر

کہ جس نے مجھ سے ذرا بھی منافقت چاہی

نہ جانے کیوں مجھے ٹھکرا دیا زمانے نے

نہ سیم و زر کی طلب کی نہ سلطنت چاہی

بس ایک بار مجھے کھول کر پڑھا عابدؔ

پھر اس نے میری محبت سے معذرت چاہی

waraq wahi tha magar dusri parat chahi

ke main ne us ki mohabbat se munfaat chahi

maza ajab tha mohabbat bhari larai mein

ke chher kar use fauri muzahamat chahi

bichharte waqt use mur ke bhi nahin dekha

tamam umr judai mein afiyat chahi

main aur hi tha juda hi tha is zamane se

aur us ne qais ke jaisi mutabaqat chahi

khud apni zist ko barbad kar liya akhir

ke jis ne mujh se zara bhi munafaqat chahi

na jane kyun mujhe thukra diya zamane ne

na sim-o-zar ki talab ki na saltanat chahi

bas ek bar mujhe khol kar parha abid

phir us ne meri mohabbat se maazarat chahi