جو صاف گو ہوں تو اونچی جگہ کھڑا ملوں گا

جو صاف گو ہوں تو اونچی جگہ کھڑا ملوں گا

وگرنہ تجھ کو کہیں خاک میں پڑا ملوں گا

تو سالوں بعد بھی مجھ کو منانے آئے تو

میں اپنی ایک ہی ضد پر تجھے اڑا ملوں گا

تو خود کو یوں ہی گراتا رہا تو آخر کار

میں تیرے قد سے تجھے سو گنا بڑا ملوں گا

لکیر کھینچ کے رکھنا تسلی کی خاطر

کہ اپنی حد سے نہ یکسر تجھے بڑھا ملوں گا

ہوں با وفا تو مرا سر نہیں جھکے گا کبھی

جو بے وفا ہوں تو پھر شرم سے گڑا ملوں گا

صداقتیں مری شاداب ہی رکھیں گی مجھے

میں زرد پتا نہیں ہوں کہ جو جھڑا ملوں گا

ستم سے بھاگ کے جینا ہے موت سے بد تر

برائے حق میں تجھے دار پر چڑھا ملوں گا

jo saf go hun to unchi jagah khara milunga

wagarna tujh ko kahin khak mein para milunga

tu salon baad bhi mujh ko manane ae to

main apni ek hi zid par tujhe ura milunga

tu khud ko yun hi girata raha to akhir kar

main tere qad se tujhe so gina bara milunga

lakir khinch ke rakhna tasalli ki khatir

ke apni had se na yaksar tujhe barha milunga

hun ba wafa to mira sar nahin jhukega kabhi

jo be wafa hun to phir sharm se gira milunga

sadaqaten miri shadab hi rakhengi mujhe

main zard patta nahin hun ke jo jhara milunga

sitam se bhag ke jina hai maut se bad tar

bara-e-haq mein tujhe dar par charha milunga