ہر شکن وقت کی پیشانی پہ رکھی ہوئی ہے

ہر شکن وقت کی پیشانی پہ رکھی ہوئی ہے

ہم نے یوں زندگی آسانی پہ رکھی ہوئی ہے

کچھ بھی کہہ لیجئے بنیاد ہے آخر بنیاد

کیا ہوا گر یہ زمیں پانی پہ رکھی ہوئی ہے

گفتگو کیسے کریں اہل خرد سے کہ وہاں

اپنی ہر بات ہی نادانی پہ رکھی ہوئی ہے

تم نے سمجھا ہے تو بس اتنا ہمیں کہ ہم نے

زندگی یوں ہی پریشانی پہ رکھی ہوئی ہے

اپنی پہچان تو بس یہ ہے کہ پہچان اپنی

ہم نے اجداد کی سلطانی پہ رکھی ہوئی ہے

ہائے کہ جنس گراں بھی ہے لہو انساں کا

اور یہی شے ہے کہ ارزانی پہ رکھی ہوئی ہے

ایک مدت سے ہے دلی میں عبیدالرحمن

یہ نظر اب بھی کہ حیرانی پہ رکھی ہوئی ہے

har shikan waqt ki peshani pe rakhi hui hai

ham ne yun zindagi asani pe rakhi hui hai

kuchh bhi kah lijiye buniyad hai akhir buniyad

kya hua gar ye zamin pani pe rakhi hui hai

guftugu kaise karen ahl-e-khirad se ke wahan

apni har bat hi nadani pe rakhi hui hai

tum ne samjha hai to bas itna hamen ke ham ne

zindagi yun hi pareshani pe rakhi hui hai

apni pahchan to bas ye hai ke pahchan apni

ham ne ajdad ki sultani pe rakhi hui hai

hae ke jins-e-giran bhi hai lahu insan ka

aur yahi shai hai ke arzani pe rakhi hui hai

ek muddat se hai dili mein ubaidalrrahaman

ye nazar ab bhi ke hairani pe rakhi hui hai