ہم برا کرتے یا بھلا کرتے

ہم برا کرتے یا بھلا کرتے

سوچ کر کوئی فیصلہ کرتے

تم تعلق کا پاس تو رکھتے

خوش نہ کرتے ہمیں خفا کرتے

دوستو کاش دکھ کے لمحوں میں

تم دوا کرتے ہم دعا کرتے

کر دی دشوار رہ گزار زیست

اور کیا کام رہنما کرتے

رکھتے رشتوں میں یوں توازن ہم

کچھ وفا کرتے کچھ جفا کرتے

سر اٹھاتے قبولیت کے بعد

سجدۂ شوق یوں ادا کرتے

بات تھی جب کہ بت کدے میں عبیدؔ

بیٹھ کر تم خدا خدا کرتے

ham bura karte ya bhala karte

soch kar koi faisla karte

tum taalluq ka pas to rakhte

khush na karte hamen khafa karte

dosto kash dukh ke lamhon mein

tum dawa karte ham dua karte

kar di dushwar rah guzar-e-zist

aur kiya kam rahnuma karte

rakhte rishton mein yun tawazun ham

kuchh wafa karte kuchh jafa karte

sar uthate qubuliyat ke baad

sajda-e-shauq yun ada karte

bat thi jab ke but kade mein ubaid

baith kar tum khuda khuda karte