Arooz is now on the App Store, for iPhone and iPad. Download →

All poetry

تصور میں مرے ایسے کوئی چہرہ نکلتا ہے

Obaidur Rahman (1961–2014)

تصور میں مرے ایسے کوئی چہرہ نکلتا ہے

کہ سوکھی شاخ پر جیسے ہرا پتہ نکلتا ہے

فرشتے گھر کی چوکھٹ پر کھڑے رہتے ہیں صف باندھے

کہ جب اسکول کو گھر سے کوئی بچہ نکلتا ہے

زمیں بھی جیسے میرا امتحاں لینے کے در پے ہے

جدھر پاؤں بڑھاتا ہوں ادھر صحرا نکلتا ہے

حقیقت ان کی جو بھی ہو عقیدہ ہے یہی اپنا

انہیں خوابوں سے منزل کے لیے رستہ نکلتا ہے

سفر سورج کا مجھ کو جب کبھی درپیش آ جائے

تو میرا ہم سفر بن کر مرا سایہ نکلتا ہے

کرے گی منفعت حاصل اسی سے فصل مستقبل

ہماری ذات سے جو یہ سخن دریا نکلتا ہے

مجھے میری نظر میں معتبر کرتا ہے وہ پیہم

مرا دشمن مرے حق میں صدا سچا نکلتا ہے

ہماری پیاس سچی ہے ہم اسماعیل والے ہیں

جہاں ایڑی رگڑ دیں ہم وہیں دریا نکلتا ہے

ذلیل و خوار ہوتے ہیں عبیدؔ باخبر لوگو

محبت کا مگر سر سے کہاں سودا نکلتا ہے