گھر کے اندر بھولی بھالی صورتیں اچھی لگیں

گھر کے اندر بھولی بھالی صورتیں اچھی لگیں

مسکراتی گل کھلاتی رونقیں اچھی لگیں

جب سسکتی رینگتی سی زندگی دیکھی کہیں

پھر خدا کی دی ہوئی سب نعمتیں اچھی لگیں

ایک دل سے دوسرے دل تک سفر کرتے رہے

رہ گزار شوق میں یہ ہجرتیں اچھی لگیں

دھوپ کے لمبے سفر سے لوٹ کے آئے جو گھر

بند کمرے میں سکوں کی ساعتیں اچھی لگیں

دل کی دنیا حسرتوں کے دم سے ہی آباد ہے

گاہے گاہے ہم کو اپنی حسرتیں اچھی لگیں

جن گھروں میں عظمت رفتہ کے روشن تھے چراغ

ان کے بام و در ہمیں ان کی چھتیں اچھی لگیں

عیب اپنے چہرے کا کس کو نظر آیا عبیدؔ

آئنے میں سب کو اپنی صورتیں اچھی لگیں

ghar ke andar bhuli bhali suraten achchhi lagen

muskurati gul khilati raunaqen achchhi lagen

jab sisakti rengti si zindagi dekhi kahin

phir khuda ki di hui sab nematen achchhi lagen

ek dil se dusre dil tak safar karte rahe

rah guzar-e-shauq mein ye hijraten achchhi lagen

dhup ke lambe safar se laut ke ae jo ghar

band kamre mein sukun ki saaten achchhi lagen

dil ki duniya hasraton ke dam se hi abad hai

gahe gahe ham ko apni hasraten achchhi lagen

jin gharon mein azmat-e-rafta ke raushan the charagh

un ke bam-o-dar hamen un ki chhaten achchhi lagen

aib apne chehre ka kis ko nazar aya ubaid

aine mein sab ko apni suraten achchhi lagen