مسئلے میرے سبھی حل کر دے

مسئلے میرے سبھی حل کر دے

ورنہ یا رب مجھے پاگل کر دے

وقت کی دھوپ میں جلتا ہے بدن

مجھ پہ سایہ کوئی آنچل کر دے

ایسی تہذیب سے حاصل کیا ہے

جو بھرے شہر کو جنگل کر دے

روک رکھی ہے گھٹا آنکھوں میں

ورنہ بہہ جائے تو جل تھل کر دے

وہ جو رکھتا ہے مجھے نظروں میں

کہیں نظروں سے نہ اوجھل کر دے

شہر میں جادو ہے جانے کیسا

زر خالص کو جو پیتل کر دے

غم ہے سوغات کی صورت یا رب

تو مرے غم کو مسلسل کر دے

masale mere sabhi hal kar de

warna ya rab mujhe pagal kar de

waqt ki dhup mein jalta hai badan

mujh pe saya koi anchal kar de

aisi tahzib se hasil kya hai

jo bhare shahr ko jangal kar de

rok rakhi hai ghata ankhon mein

warna bah jae to jal thal kar de

wo jo rakhta hai mujhe nazron mein

kahin nazron se na ojhal kar de

shahr mein jadu hai jane kaisa

zar-e-khalis ko jo pital kar de

gham hai saughat ki surat ya rab

tu mire gham ko musalsal kar de