ہے آج اندھیرا ہر جانب اور نور کی باتیں کرتے ہیں

ہے آج اندھیرا ہر جانب اور نور کی باتیں کرتے ہیں

نزدیک کی باتوں سے خائف ہم دور کی باتیں کرتے ہیں

تعمیر و ترقی والے ہیں کہیے بھی تو ان کو کیا کہیے

جو شیش محل میں بیٹھے ہوئے مزدور کی باتیں کرتے ہیں

یہ لوگ وہی ہیں جو کل تک تنظیم چمن کے دشمن تھے

اب آج ہمارے منہ پر یہ دستور کی باتیں کرتے ہیں

اک بھائی کو دوجے بھائی سے لڑنے کا جو دیتے ہیں پیغام

وہ لوگ نہ جانے پھر کیسے جمہور کی باتیں کرتے ہیں

اک خواب کی وادی ہے جس میں رہتے ہیں ہمیشہ کھوئے ہوئے

دھرتی پہ نہیں ہیں جن کے قدم وہ طور کی باتیں کرتے ہیں

ہم کو یہ گلہ محبوب انہیں افسانۂ بزم عیش و طرب

شکوہ یہ انہیں ہم ان سے دل رنجور کی باتیں کرتے ہیں

کیا خوب ادا ہے ان کی عبیدؔ انداز کرم ہے کتنا حسیں

مجبور کے حق سے ناواقف مجبور کی باتیں کرتے ہیں

hai aj andhera har janib aur nur ki baten karte hain

nazdik ki baton se khaif ham dur ki baten karte hain

taamir-o-taraqqi wale hain kahiye bhi to un ko kya kahiye

jo shish mahal mein baithe hue mazdur ki baten karte hain

ye log wahi hain jo kal tak tanzim chaman ke dushman the

ab aj hamare munh par ye dastur ki baten karte hain

ik bhai ko duje bhai se larne ka jo dete hain paigham

wo log na jane phir kaise jamhur ki baten karte hain

ik khwab ki wadi hai jis mein rahte hain hamesha khoe hue

dharti pe nahin hain jin ke qadam wo tur ki baten karte hain

ham ko ye gila mahbub unhen afsana-e-bazm-e-aish-o-tarab

shikwa ye unhen ham un se dil ranjur ki baten karte hain

kya khub ada hai un ki ubaid andaz-e-karam hai kitna hasin

majbur ke haq se nawaqif majbur ki baten karte hain